भविन कार्की, सङ्खुवासभा २३ कात्तिक
सङ्खुवासभाको भोटखोला गाउँपालिका–१ किमाथाङ्कामा सशस्त्र प्रहरी बलले शैक्षिक सामग्री तथा न्यानो कपडा वितरण गरेको छ । भोटखोला –१ किमाथाङ्का स्थित सीमावर्ती क्षेत्रमा रहेको हिमालय आधारभूत विद्यालयका विद्यार्थीलाई सशस्त्र प्रहरी बलले शैक्षिक सामग्री तथा न्यानो कपडा (ट्रयाक सुट) वितरण गरेको हो ।
सशस्त्र प्रहरी बल नेपाल नम्बर ४ अरुण गुल्मको आयोजनामा उत्तरी क्षेत्रको किमाथाङ्कामा हिमालय आधारभूत विद्यालयका विद्यार्थीलाई शैक्षिक सामग्री तथा न्यानो कपडा (ट्रयाक सुट) वितरण गरेको छ । दुर्गम तथा सीमावर्ती क्षेत्रमा हिमालय आधारभूत विद्यालयका विपन्न परिवार र विपद् पीडित विद्यार्थीलाई शैक्षिक सामग्री न्यानो कपडा (ट्रयाक सुट) वितरण गरिएको सशस्त्र प्रहरी बल नेपाल नम्बर ४ अरुण गुल्मका प्रहरी नायव उपरीक्षक बाबुराम पौडेलले बताउनुभयो । विद्यार्थीहरुलाई जाडोमा सहजताका साथ विद्यालय आउनजान सहयोग पुग्ने उद्देश्यले न्यानो कपडा वितरण गरिएको उहाँको भनाइ छ । सङ्खुवासभाका प्रमुख जिल्ला अधिकारी सिर्जना थपलियाको उपस्थितीमा उक्त विद्यालयका करिव ३० जना विद्यार्थीलाई शैक्षिक सामग्री न्यानो कपडा (ट्रयाक सुट) वितरण गरिएको सशस्त्र प्रहरी नायव उपरीक्षक पौडेलले बताउनुभयो । प्रमुख जिल्ला अधिकारी थपलियाले सशस्त्र प्रहरी बल केवल सुरक्षाकर्मीमात्र होइन, समुदायसँग जोडिएर सामाजिक उत्तरदायित्व बहन गर्दै आएकाले यस्तो अभियानले स्थानीयमा सुरक्षाप्रतिको विश्वास र आत्मीयता बढाएको बताउनुभयो । हिमाली जिल्ला सङ्खुवासभाको उत्तरी क्षेत्र भोटखोला हिउँद मौसममा निक्कै चिसो हुने गर्दछ ।
सशस्त्र प्रहरीको बिओपीको समन्वयमा शैक्षिक सामगी तथा न्यानो कपडा (ट्रयाक सुट) वितरण गरिएको किमाथाङ्का बिओपीका प्रमुख सशस्त्र प्रहरी निरीक्षक नविन खतिवडाले बताउनुभयो । त्यस्तैगरी प्रमुख जिल्ला अधिकारी सहितको सुरक्षा टोली,सीमा सुरक्षा पोष्ट (बिओपी) र चिनियाँ प्रहरीको संयुक्त टोलीले जिलाको उत्तरी क्षेत्र किमाथांका नाकामा रहेका नेपाल–चीन सीमाका स्तम्भ निरीक्षण गरेको छ । सशस्त्र प्रहरीले जनप्रतिनिधी, स्थानीय सँग सीमाबासीको समस्या तथा समाधान एंव शान्ति सुरक्षा लगायतका विषयमा अन्तरक्रिया समेत गरेको किमाथाङ्का बिओपीका प्रमुख सशस्त्र प्रहरी निरीक्षक खतिवडाले बताउनुभयो । नेपाल–चीनको सीमाअन्तर्गत सङ्खुवासभामा २१ वटा स्तम्भ छन् । भोटखोला गाउँपालिका वडा नं १, २ र ३ को भूभाग चीनसँग जोडिएको छ । यस क्षेत्रमा करिब पाँच हजारको बसोबास छ । किमाथाङ्का नाकामा २०७६ सालमा सशस्त्र प्रहरी बल सीमा सुरक्षा पोष्ट स्थापना भएको हो ।
